أبرز العناوين

أصدقاء المخطوطة

الخميس، 14 نوفمبر، 2013

كش ملك ... بقلم / نوران الشاملي




ميعرفش عنها حاجة غير إن اسمها نوران

و معرفش الاسم منها

ده عرفه من إيصال دفع رسوم اشتراك تعليم الشطرنج

لما قدمتهوله و سألته : هنبتدي امتى ؟

في أول مرة استغرب انها رفضت الجيش الأبيض

و إختارت الجيش الأسود

ابتسم و قالها :
غريبة .. محدش أبدًا بيختار الإسود .. الكل بيتفائل بالأبيض

قالتله بلا مبالاة : أكيد ميعرفوش إن سر القوة دايمًا مدفون فى اللون الإسود

استغرب أكتر لما لقاها بتعرف تلعب و إنها مش محتاجة حد يعلمها

و سألها : دفعتي اشتراك تعليم ليه طالما بتعرفي تلعبي؟!!

ردت عليه بثقة : معنديش حد ألعب معاه و ... أهزمه 

بمرور الوقت لاحظ إن شعرها دايما مبلول فى كل حصة

مرة سألها : إيه سر الشعر المبلول ؟

جاوبته : بيكون عندي تدريب سباحة قبل الشطرنج

حس بقشعرة في جسمه لما نطقت بكلمة سباحة

و تخيلها وهي بتنط فى حمام السباحة بــ قسوة

زي قسوتها في حصار الملك بتاعه و هي بتقول بلهجة عادية 
و كأنها متعودة على الإنتصار

" كش ملك "

شيء غريب كان بيخليه عايز يعرف عنها كل حاجة

لكن ملامح وشها الجامدة و الخالية من أي تعبير

كانوا بيخوفوه انه يسألها

في يوم انتصر على خوفه 
وسألها اذا كان ينفع يعزمها على فنجان قهوة بعد الحصة

رفضت متعللة بإن عندها درس رقص بعد الحصة

اندهش و مقدرش يمنع نفسه من انه يسألها

سباحة و شطرنج و رقص !!!!!!! ... و ايه تاني يا ترى ؟

جاوبته من غير ما ترفع عينها من على رقعة الشطرنج

"و حفظ قرآن و عزف على العود و رماية و كورشيه و أورجامي و كونغ فو"

لما سألها : ليه كل ده ؟

جاوبت ببساطة وهي بتحاصر الملك بتاعه بحصانها

" أصل عندى واوا بداريها .. كش ملك "

ـــــــــــــــــ
انتهى 







مع تحيات ... 


ليست هناك تعليقات:

إرسال تعليق

تعليقك على المخطوطة دليل إيجابيتك في التفاعل مع الأحداث ، فلا تجعل عناد قلمك يسلب منك تلك الإيجابية

Google+ Followers

ضع بريدك هنا وتابعنا