أبرز العناوين

أصدقاء المخطوطة

الجمعة، 6 ديسمبر 2013

الولد راح ... بقلم : هبة الله وحيد


وزى كل ام طبيعى احلم
وكانت لسه ضوافره ناعمه
واقول بكره يكبر واشوفه يخطى
وبعديها يجرى
وامتى اشوفك فى المدرسه
واعيش واشوفك بمسطرة الهندسه
وأشاور ليك واقول شوفوا ابنى
حته منى على الارض ماشيه
ياااه ياما نفسى اشوفك عريس
ويارب يطول فى عمرى واشوف ليك ولد
وكبر نور عنيه وسقيته من عمرى
انا اذبل وهو يكبر وديه سنة ربنا فى خلقه
وكل ما تعدى مرحله اقول هانت اديه بيكبر
وبكره يوصل ويرحنى
وفى يوم كئيب اسود قالى سلام ياما
نازل انا الجامعه
ووطى على ايدى باسها كأنه بيودعنى
ربنا يحفظك يا ابنى ويسلمك ليا
والقلق شغال وقلبى بينتفض
فى ايه مش عارفه
بيقولوا فى مظاهرات
ابص للتلفزيون الاقى ابنى سايل دمه وروحه بتطلع
لا هو مش هو محدش يقول هو
هاتولى ابنى ردولى روحى
خلاص كده القصه انتهت
مفيش ولد مفيش ولد
طب مين هيقولى ياما وهستنى مين انا
وقالولى طلقة غدر طايشه صابوا بيها الولد
صابوا بيها قلبى صابوا بيها روحى
مليش دعوه انا عايزه الولد
قالوا مات الولد ازاى نجيبه
اهدى يا حجه واستعوضى الولد
طالما مش فى ايدكوا تجيبوه
ليه تصيدوا روحه من البلد
راح الولد راح الولد





مع تحيات ..

ليست هناك تعليقات:

إرسال تعليق

تعليقك على المخطوطة دليل إيجابيتك في التفاعل مع الأحداث ، فلا تجعل عناد قلمك يسلب منك تلك الإيجابية

Google+ Followers

ضع بريدك هنا وتابعنا